التورلي على طريقة أم مريم

ياللا نبدا
بسم الله الرحمن الرحيم

أول حاجة انتي بتجيبى اللحمة تقطعيها قطع صغيره جدا جدا جدا
لأننا هنسويها مع الخضار في نفس الوقت
يعني تبقا بالشكل ده



لو تلاحظوا
انا هنا استخدمت لحمة موزة
لأن مفيهاش دهون
عايزة اقولكم انها لما بتتعمل بالريش بس طبعا مخلية ومتقطعة قطع صغيره
بتبقا روووووووووعة
بس انا بقيت أعملها بالموزة
علشان مافيهاش دهون

كفاية الحلويات اللي انا بعملها

بحاول أعوض
ههههههههههههههههههههههههههه

بعد كده نتبل اللحمة بالبصل
والملح والفلفل
طبعا تحطي الملح بتاعك على اد الطبخة كلها



بعد كده هاتي الخضار بتاعك
بعد ماتغسليه كويس قطعيه مكعبات
انا دايما بحط
بطاطس
كوسة
جزر
بسلة
فاصوليا
بس هنا انا مكانش عندي فاصوليا




بعد كده نضيف اللحمة المتبلة
ونقلبهم مع بعض كويس جدا



نجيب عصير الطماطم



نضيفه للخضار بتاعنا



ونقلبهم كلهم مع بعض كويس جدا جدا



نجيب الصواني بتاعتنا
نحط فيها الخضار باللحمة



بعد كده نغطيها بورق الفويل



ندخلها ع الفرن على طوووووووول
لو لاحظتوا مافيهاش سمنة ولا زيت
بس اللحمة علشان نيه وبتستوي مع الخضار
بتديله طعم جناااااااان

المهم
لازم الفرن يكون سخن وعلى أعلى درجة حرارة
خللي الصاجة اللي هتحطي عليها الصينية فوق النار مباشرة
يعني في أول رف من تحت
بعد كده سيبيها حوالي نصف ساعة على درجة الحرارة العالية دي
بعد كده نهدي النار عليها خالص ونسيبها تستوي براحتها
وكل ماتكون محكمة الغلق
هتكون أجمل في الطعم
بتعد في الفرن حوالي من ساعة ونصف لساعتين
عموما انتى هتشمي ريحتها وهي بتستوي
طبعا مااقولكيش بتبقا جنااااااااااان
والأكلة دي بصراحة هي أكتر أكله انا بحبها
ده غير انها مفيدة جدا جدا
ومابتتخنش خالص

ودي صورتها بعد ماطلعت من الفرن




كشفت حتة صغيرة من الفويل علشان اتأكد انها استوت
طبعا لو لسة مااستوتش
بندخلها الفرن تاني مفيش مشكلة
خصوصا ان الخضار بينزل مية كتير
وبيعمل شوربة
لو عايزة تنشفيها ممكن تشيلي الفويل
وتعلى عليها النار شويه لحد ماتنشف
بتبقا حلوة برضه

وده شكلها النهائي على الترابيزة
اتفضلوا معانا